Вучиќ: „Уште утре“ очекувам оставки во Владата поради несреќата во Нови Сад

Претседателот на Србија, Александар Вучиќ, вечерва изјави дека „уште утре“ се очекуваат нови оставки во врска со несреќата во Нови Сад, кога при пад на бетонска настрешница на Железничката станица загинаа 15 лица.

„Утре очекувам нови оставки во владата и на други места и сигурен сум дека надлежното обвинителство во најбрз можен рок ќе преземе мерки“, нагласи Вучиќ.

Вучиќ изрази сочувство до семејствата на жртвите и рече дека „државата ќе помогне максимално“.

„Сакам да им порачам на луѓето во Србија дека одговорноста не може да се избегне. Некогаш носиш политичка одговорност и кога си целосно невин и кога се ти се случува случајно, но мора да има значителна одговорност во кривичното право, затоа што 15 луѓе не загинале по своја вина, туку затоа што некој не си ја завршил работата доволно добро“, рече тој.

Вучиќ изјави дека новата стратешка цел на Владата е да ги исполни сите критериуми за членство во ЕУ до крајот на 2026 година.

Во обраќањето до јавноста тој додаде дека тоа е „амбициозна задача“, исто како и проектот Експо 2027.

„Целта е да ги исполниме сите критериуми за членство во ЕУ до крајот на 2026 година. Не велам дека ќе влеземе во ЕУ во 2026 или 2027 година, тоа не зависи од нас туку од Европејците, ние да ги исполниме сите критериуми тоа е неверојатно амбициозна задача, амбициозна како Експо, и не мислам само на градилиштето на Експо, туку на сето она што ќе го претставам денес“, рече Вучиќ.

Тој додаде дека е горд што Србија успеала да издржи 1.000 дена без никаква промена на позицијата за војната во Украина.

„Малкумина го познаваат Путин како мене...Некои што не го познаваат мислат дека се заканува со „празен пиштол“, изјави Вучиќ.

-Доколку е загрозена безбедноста на Москва, како и безбедноста на нејзините сили, и ако види дека нема друг излез, ќе употреби нуклеарно оружје. Во овој момент сме целосно неподготвени. Имаме 257 илјади места во прифатилишта. Треба да ја обновиме инфраструктурата за да достигнеме бројка од околу еден и пол милион луѓе кои можат да одат во засолништа. Ќе треба да полниме резерви, нема да бидеме мета, но истото ни се пишува ако целите се околу нас - изјави Вучиќ.

На прашањето што ќе направи Србија ако навистина има таков драстичен конфликт во светот, тој рече дека ќе ја заштити Србија и се пофали со модерно оружје. Вучиќ порача дека Србија нема да се меша во конфликтите на големите сили.