Болница Кавадарци: За првпат бесплатен пренатален скрининг за сите трудници
Бесплатен пренатален скрининг за сите трудници, за првпат ќе се изведува во биохемиската лабораторија при Општа болница со проширена дејност во Кавадарци, информираат од оваа јавна здравствена установа.
- Станува збор за лабораториски испитувања што се користат за BENETEH PRO пренатален скрининг. Скрининг за следење на состојбата на плодот кај бремените жени, што ќе биде целосно бесплатен и достапен за сите трудници од Кавадарци и регионот, соопштуваат од Болницата.
Оттаму додаваат дека скринингот се прави во прв и втор триместар.
- Тоа ќе им овозможи на сите бремени жени да дознаат повеќе за здравјето на нивното неродено бебе, без било каков ризик, едноставно и лесно, со земање примерок крв од вена и ехо преглед кај гинеколог, појаснуваат од здравствената установа.
Притоа нагласуваат дека со ова, пациентките се поштедени од дополнителни трошоци.
