Турција апелира за формирање инклузивна влада во Сирија

Турскиот министер за надворешни работи Хакан Фидан повика денеска на „формирање инклузивна влада“ во Сирија, во која ќе има претставници на сите етнички и верски групи, еден ден по паѓањето на режимот на претседателот Башар ал Асад.

„Очекуваме меѓународните актери, особено ОН, да му подадат рака на сирискиот народ и да го поддржат формирањето на инклузивна влада. Сакаме Сирија во која различни етнички и верски групи живеат во мир, со инклузивен пристап кон управувањето“, рече турскиот министер во обраќањето пред амбасадорите во Анкара.

Турција ги поддржува бунтовничките групи кои учествуваа во блиц-офанзивата против сирискиот режим.

Фидан рече дека сака да види „нова Сирија која ќе одржува добри односи со соседите и ќе донесе мир и стабилност во регионот“. Тој рече дека Турција е подготвена да ја даде потребната поддршка во овој поглед.