Нагелсман останува селектор на германската репрезентација до 2028 година

Селекторот на германската репрезентација Јулијан Нагелсман потпиша нов договор со кој ќе биде на чело до крајот на Европското првенство во 2028 година, соопшти Германскиот фудбалски сојуз.

Поранешниот тренер на Хофенхајм и Баерн Минхен ја презеде функцијата во септември 2023 година, кога го замени Ханси Флик, кој беше отпуштен поради лошите резултати.

Под негово водство Германците го стабилизираа настапот и лани стигнаа до четвртфиналето на домашното Европско првенство, откако претходно беа елиминирани во групната фаза на две последователни Светски првенства.

-Кога станав национален селектор во 2023 година, не можев да замислам дека ќе продолжам да работам по Европското првенство. Сепак, одличните повратни информации што ги добиваме покажуваат дека сме на вистинскиот пат. Нашата цел е да освојуваме титули заедно - навивачи, тим и тренери. Никогаш порано не замислував што значи германската репрезентација за обичните Германци. Срцата на толку многу луѓе чукаат заедно со тимот. Нашето патување сè уште не е завршено, изјави младиот стручњак по повод продолжувањето на договорот.