Стевановски: Неинформираноста на граѓаните е причината зошто се против регионален центар за управување со отпад

Градоначалникот на Општина Новаци Стевче Стевановски смета дека неинформираноста на граѓаните е клучниот проблем и причина зошто тие реагираат и се против воспоставување регионален центар за управување со отпад во близина на Битола.

Ќе мора, како што изјави денеска Стевановски, да се спроведе кампања која ќе го објасни и доближи проектот до граѓаните. Планирано е со ова да се позанимаваат и експерти, домашни и од странство.

Според градоначалникот, Новаци моментно има голем проблем со отпадот зашто на ѓубриштето во Мегленци се депонира отпад од неколку општини. Ѓубриштето, нагласи, е нестандардизирано и нерегулирано, не се знае ни што се одлага, ни што се носи.

-Битолчани протестираат можеби со право зашто овој центар е во близина на градот, на околу 15 километри, но главната причина е можеби тоа што недоволно ги информиравме за тоа како ќе изгледа овој центар за управување со отпад. Можеби во иднина ќе треба да се позанимаваме во таа насока, да направиме медиумска кампања, да го доближиме тоа до луѓето, како ќе изгледа целиот проект. Се работи за сериозен проект и ако сите сериозно се зафатиме со него, се надевам ќе направиме нешто добро, потенцира Стевановски, одговорајќи на новинарски прашања пред конференцијата за регулирање на отпадот.

Тој како пример ја посочи Грција каде, рече, има депонија во близина на два големи града и опслужува речиси ист број жители како во регионот на Битола и Новаци.

-Проектот се заговара од 2009 - 2010 година, а се развлекува зашто има големи неверувања и несигурност кај луѓето во реализацијата. Предвиден е центар за управување со отпадот, односно фабрика која ќе го управува отпадот на правилен начин како во сите западни земји. Мислам дека многу скоро луѓе кои се стручни директно на граѓаните ќе им го доловат решението кое ќе значи бенефит за целиот регион. Едно од ветувањата беше и дека ќе се направи обиколница, патна делница што ќе води до центарот за управување со отпад. Се надевам дека ова ќе ги смири граѓаните зашто сепак не се работи само за Битола која сега одлага отпад на територијата на Новаци што малку е апсурдно, подвлече Стевановски.

Пред зградата на општина Битола минатата недела се одржа втор протест против изградба на регионална депонија