„Тетово сака парк“: Советот на Општината да ја суспендира промената на Генералниот и деталниот урбанистички план за блокот 31

Граѓанската иницијатива „Тетово сака парк“ упати барање до советниците на Општина Тетово да се суспендира одлуката за промена на ГУП и ДУП за УБ 31 (Монопол) донесена на 9 октомври 2024 година. Според нив ова барање е поради загриженоста, револтот и разочараноста на граѓаните од сите возрасти и етникуми со оглед на пренамената на просторот за градење згради.

-Бараме да се интензивира процесот за усвојување на нов, современ и хуман генерален урбанистички план, со вклучена стручна и општа јавност. Како врвна цел да се постави хуманизирањето и зазеленувањето на градот, а до неговото усвојување да не се дозволи парцијална промена на ГУП по мерка на урбаната мафија и приватниот капитал. Доколку останете глуви на ова барање, потсетете се дека во октомври ние повторно бираме и засрамени бидете подалеку од нашите очи, велат од „Тетово сака парк“.

Од таму со порака до советниците дека за да се постави на дневен ред точката за суспензија на оваа одлука, потребна е волјата и совеста на барем еден советник од сите 31.

Иницијативата „Тетово сака парк" која предлагаше формирање парковска површина во делот од просторот на поранешниот „Монопол“со измена на Генералниот и Деталниот урбанистички план за намената Д - паркови и зеленило, алармира дека сега Општината ја прави измената но од место за индустрија го предвидува за изградба на станови.