Уапсен сопственик на ресторан во Грција поради декорирање со антиквитети

Сопственик на ресторан во грчкото туристичко место Парга беше уапсен откако во неговиот локал беа пронајдени околу 90 парчиња оригинални антиквитети, дел стари и над две илјади години.

Локалните власти соопштиja дека станува збор за грнчарија што главно потекнува од античкиот период и дел од доцниот среден век, а биле изложени како декорација во ресторанот.

Тие најверојатно се извадени од морето, а некои се земени од потонат брод во близината на ова место.

Полицијата го уапси 32-годишниот сопственик на локалот согласно грчките закони за заштита на културното наследство, но тој не е осомничен за продажба на артефактите.

Сопственикот тврди дека вредните артефакти ги наследил од дедо му, кој ги вадел од морето.

Согласно грчките закони сите артефакти се сопственост на државата.