Грчки медиуми: Решението во рацете на Заев и Ципрас

Изјавата на медијаторот Метју Нимиц по вчерашната шестчасовна средба со шефовите на македонската и грчката дипломатија, ја пренесуваат медиумите во Грција, со коментар дека топката и решението сега се во рацете на премиерите Зоран Заев и Алексис Ципрас.

„Средба Ципрас - Заев: Нов прозорец за решение“; „Скопското прашање: Палката во рацете на премиерите“; „По шестчасовната средба на Нимиц, Коѕијас и Димитров соопштена средбата Ципрас- Заевт“; „Во рацете на Заев и Ципрас палката за скопското прашање“; „Сунио ги обнови амбициите за решение на скопското прашање“ се дел од насловите во медиумите во Грција за вчерашната средба на Димитров - Коѕијас - Нимиц, јави дописничката на МИА од Атина.

- Средбата на Коѕијас и Димитров со Метју Нимиц, во траење од шест часа, доведе до поклопување на позициите и го отвори патот за средба на двајцата премиери, објави грчката државна телевизија ЕРТ.

- Ако немаше напредок во разговорите, немаше да се закаже средбата на двајцата премиери, рече новинарката од грчката телевизија Алфа во синоќешното издание на централните вести.

- Во рацете на премиерите Алексис Ципрас и Зоран Заев поминува следниот круг преговори за скопското прашање. Коѕијас и Димитров во сенка на храмот на Посејдон во Сунио ги доведоа преговорите во крајната фаза и сега клучните одлуки се пренесуваат на највисоко ниво, објави телевизијата Антена.

- По продуктивната, според Нимиц, средба на Коѕијас и Димитров во Сунио, состанокот Ципрас - Заев во Софија е одлучувачки за преговорите, пишува порталот Њуз 247.

- Палката за решавање на името веќе е во рацете на премиерите на Грција и ПЈРМ, по средбата на министрите за надворешни работи на двете земји со Метју Нимиц. Разликата и понатаму е за ерга омнес, додека пак во изминатите часови се чини дека на преговарачката маса се наоѓа конечниот предлог на Скопје, напиша доцна синоќа грчкиот информативен портал Ин, пренесувајќи ги информациите објавени во весникот „Та неа“, односно како што вчера објави МИА, сценариото за решение со период од две години за имплементација.

Ова сценарио го пренесоа и други грчки електронски медиуми, како наводен предлог од македонска страна.

Грчките медиуми потсетуваат дека средбата на Заев и Ципрас на маргините на Самитот ЕУ- Западен Балкан во Софија ќе биде втора по ред, по разговорите во јануари во Давос.

Вчерашната средба во хотел во местото Сунио во близина на Атина, заврши без изјави од шефовите на двете дипломатии и без да постојат дополнителни информации или детали за преговорите на Димитров, Коѕијас и Нимиц.