Отворена библиотека во село Батинци

Во село Батинци во општина Студеничани денеска беше отворена библиотека со поддршка од Министерството за култура, Организацијата за миграции на Обединетите нации (ИОМ), Владата на Велика Британија и од приватниот сектор.

Како што соопшти Мнистерството за култура, на отворањето присуствувал министерот Хусни Исмалили, кој истакнал дека покрај тоа што Министерството обезбедило голем книжен фонд за библиотеката, ја поддржува и иницијативата за овој преокт на Здружението на граѓани „Еколошка организација на село Батинци“.

– Уверен сум дека овој проект ќе биде поттик и за останатите слични организации да се охрабрат во остварување акции за развој на руралните средини и намалување на разликите помеѓу градот и селото, како и за отворање можност, главно за младите луѓе, да се пронајдат во космополитскиот дух во градење едно општество за сите, истакна Исмаили.

Министерството посочува дека проектот е дел од стратегијата на Владата преку општествени активности насочени пред сѐ за младите, да се гради хумано општество кое, како што наведува – „ќе се бори против сите негативни влијанија кои ги демнат младите и против насилниот екстремизам во кој и да е облик“.