Фестивалот „Златен тапан“ ќе разгледува како креативноста поттикнува промени

Низ предавања од Славој Жижек и 39 други говорници, 26. Меѓународен фестивал на креативноста „Златен тапан“ („Zlati boben“) во Порторож, Словенија, на 17 и 18 октомври, ќе разгледува како креативните дејности може да поттикнат позитивни промени во општеството.

На најпознатиот словенечки философ во фестивалскиот форум ќе му се придружат еден невронаучник, фотографка од Нешнал џиграфик, режисер награден на Санденс, како и бројни стручњаци за односи со јавноста и раководители во рекламната индустрија.

Во текот на двата фестивалски дена, учесниците ќе разменуваат мислења како „Креативноста поттикнува промени“, слоганот на годинашниот „Златен тапан“.

Проф. Богдан Драгански, директор на Лабораторијата за невроснимање на Универзитетот во Лозана, Швајцарија, ќе зборува за тоа каква врска има креативноста со мозокот.

Фотографката Рена Ефенди од Азербејџан, која соработувала со Њујорк тајмс, Вог, Њујоркер, Њузвик, Тајм и други светски списанија, ќе ги раскаже своите искуства во обраќањето под наслов „Придвижена од Нешнал џиографик“.

Полскиот режисер Михал Марчак и директорката на Меч-енд-спарк Ана Рожалска ќе понудат совети за снимање филмови, спотови и реклами, како и анегдоти од соработката со оскаровци и музички бендови како Рејдиохед.

Сепак, главниот настан на фестивалот „Голден драм“ е официјалниот натпревар за рекламни материјали, кој е отворен за пријавување до 3 септември.

Според организаторите, право на учество имаат сите компании што изработуваат маркетиншки пораки во Северна Македонија и други земји од регионот.

Дизајнерите на постери не постари од 30 години имаат време до 10 септември да се пријават за натпреварот на тема „Словенија, земја на чисти и здрави води“ поддржан од Словенечкото туристичко биро.