Халанд: Никогаш не знаеш што ќе се случи утре, но денес сум среќен во Манчестер Сити

Голгетерот на Манчестер Сити, Ерлинг Халанд, увери дека е многу среќен во Манчестер Сити во моментов, но со предупредувањето дека никогаш не се знае што ќе донесе иднината.

Така, Норвежанецот не ги демантираше шпекулациите кои го поврзуваат со трансфер во Реал Мадрид.

-Многу сум среќен во Сити. Исклучително сум среќен со сите наоколу - менаџерот, управниот одбор, директорите... Сега ќе кажам дека никогаш не се знае што ќе донесе иднината, која веројатно ќе биде на големи наслови, но јас сум среќен овде. Нов договор? Главно сум концентриран на мојата работа на теренот. Во моментов има многу натпревари - пред два дена игравме дерби, сега имаме натпревар од Лигата на шампионите, потоа во недела доаѓа пресметката со Ливерпул. Мислам дека треба да бидам фокусиран на тоа, изјави стрелецот на Сити.

Откако минатата сезона ги предводеше сите по постигнати голови и ја освои тројната круна, но тоа не му помогна да го претекне Лионел Меси во битката за најголемите индивидуални награди, Халанд беше прашан дали Аргентинецот треба да се откаже од фудбалот за да има шанса некој друг да освоите овие награди.

- Добро прашање. Не знам. Да, точно е дека ги освои овие награди. Го освои и Светското првенство. Не знам што да кажам. Меси е најдобриот фудбалер кој некогаш играл, вели Норвежанецот.