Охридските матуранти со танц на Градскиот плоштад го прославија полнолетството

Околу 400 матуранти од охридските средни училишта денеска беа дел од убавата традиција полнолетството да биде прославено со танц што истовремено се игра во повеќе градови во земјата и во други градови низ Европа.

Нив ги поздрави градоначалникот Кирил Пецаков, посакувајќи им реализација на она што го замислиле за својата иднина, да сонуваат и да не се откажуваат од соништата...

- Оние кои се доволно луди да мислат дека можат да го променат светот се оние и кои го прават тоа. Во животот разликата помеѓу успехот и неуспехот помалку или повеќе се должи на храброста. Човекот не може да се искачи по скалилата на животот со рацете в џеб, рече тој.

Пецаков уште им порача секогаш да се однесуваат добро и да не дозволат никој да им го наруши интегритетот, да бидат љубезни и великодушни кон луѓето околу нив

- Успешните луѓе секогаш бараат можност да им помогнат на другите. Неуспешните луѓе секогаш прво прашуват „А јас што ќе добијам од тоа?“. Сонувајте големи сонови и бидете оптимисти со што и да се занимавате во животот“, рече Пецаков.

Првата Матурска парада се одржа во 2001 година во Словенија, како идеја на Томаж Амброж од Танцовата школа „Уршка“ во Љубљана.