Доривал Жуниор останува бразилски селектор

Бразилската фудбалска федерација нема намера да го смени селекторот Доривал Жуниор по елиминацијата на националниот тим во четвртфиналето на Копа Америка.

Првиот човек на бразилскиот фудбал Едналдо Родригез најави во изјава за ЕСПН дека Доривал ќе остане на селекторската клупа до Светското првенство во 2026 година.

Бразил во саботата вечер загуби од селекцијата на Уругвај на пенали 2-4 во четвртфиналето на Купот на Америка.

„Целта на Копа Америка беше да се обнови тимот, тоа беше важен период бидејќи тренерот и играчите можеа да комуницираат еден со друг одредено време“, рече Родригез.

„Обично камповите за обука не траат долго, но сега тренерот можеше да види многу и да донесе заклучоци. За два месеци повторно ќе имаме квалификациски натпревари; целта на проектот е да продолжиме со соработката, да го направиме тимот посилен и да работиме за заедничката кауза Целта се натпреварите на есен, за тоа е свесен и стручниот штаб“, додаде Родригез.

Во квалификациите за СП 2026, Бразил е на шестото место со седум бодови по шест кола. Во септември Бразил ќе биде домаќин на Еквадор и ќе гостува во Парагвај.