Во Делчево одбележани 21 година од хиротонијата на г.Марко во епископски чин

Со литургија одржана во црквата Успение на Пресвета Богородица во Делчево, денес се одбележа 21 година од хиротонијата во епископски чин на епископот делчевско-каменички г.Марко. На литургијата присустуваа митролитот Врањски г.Пахомиј, владиката Јакоб Стобиски и други свештеници и свештенослужители од Брегалничката и Делчевско-каменичката епархија.

-Голема чест ми направивте што дојдовте овде да ја споделиме радоста која ја изразуваме преку благодарност кон Бога, а таа благодарност ја изразуваме преку литургијата која е единствената христијанска благодарност кон Бога. Радоста не не напушта, заради заедничарењето со Господ, кој заради сите нас воскресна и нас не воскреснува за живот вечен. Би сакал да се заблагодарам на митрополитот г.Пахомиј кој и покрај лошото време, пристигна, за да оддаде почит на нашата хиротонија која се случи пред 21 година во Врањската епархија. Исто така благодарност до владиката Јакоб, градоначалникот на Македонска Каменица и сите останати кои присуствуава денес во храмот во Делчево, рече г.Марко.

По завршувањето на Божествената литургија верниците се причестија со светите Христови тајни, а потоа следуваше промоција на џебниот молитвеник.

-Во пресрет на Св.Климент Охридски кој е заштитник на Македонската православна црква - Охридска Архиепископија ќе имаме промоција на нашиот молитвеник. Ова е само една најава за она што ќе следува, а денеска на годишнината од хиротонијата на г.Марко ќе ви го претставиме џебниот молитвеник за духовна поддрка на верниците во нивното секојдневие. Содржи молитви и мисли прилагодени за верниците со вредности и за духот и за телото, истакна протоереј Александар Васев.

За следната година најавија поплодоносна година во однос на издаваштвото под покровителство на епархијата.