Уапсен поранешниот министер за одбрана на Јужна Кореја

Судот во Сеул соопшти дека го одобрил налогот за апсење на поранешниот министер за одбрана, Ким Џонг-хјун, под обвинение дека ја имал клучната улога во бунтот и злоупотребата на власта, со што стана првиот уапсен функционер поради декретот за воената состојба, што беше издаден на 3 декември од на јужнокорејскиот претседател Јун Сук-Јул.

Ким, близок соработник на претседателот Јул, во четвртокот поднесе оставка на функцијата и од неделата е во притвор. Обвинителите имаат рок од 20 дена да одлучат дали ќе го обвинат. Осудата за обвинението за бунт може да му донесе и смртна казна.

Ким е обвинет дека му препорачал на Јун да воведе воена состојба и да ја испрати војската во Националното собрание за да ги спречи пратениците да гласаат за негово отповикување за корупција. Голем број пратеници успеаја да влезат во собранието и едногласно го отфрлија декретот на Јун, принудувајќи го кабинетот да го укине уште на 4 декември.

Ким во денешната изјава рече дека „длабоко се извинува за предизвикувањето вознемиреност и непријатности“, додавајќи дека е целосно одговорен за воведувањето на воената состојба.

Парламентот под контрола на опозицијата денеска усвои предлог-закон со кој се назначува независен специјален советник за истрага на Јун и други високи воени функционери во врска со воведувањето на воената состојба.

Главната опозициска Демократска партија се залага за истрага од страна на специјален обвинител, тврдејќи дека не може да им се верува на јавните обвинители да спроведат темелна истрага за Јун, кој самиот беше поранешен главен обвинител.

За време на денешното парламентарно сослушување, Квак Јонг-Кеун, командантот на командата за специјални операции чии војници беа испратени во парламентот, сведочеше дека добил директни инструкции од Ким Џонг-хјун да ги попречува пратениците да влезат во главната сала на Националното собрание.

Квак рече дека целта на упатствата на Ким е да се спречи парламентарното гласање за укинување на воената состојба на Јун.

Опозициските партии и многу експерти сметаат дека декретот за воена состојба е неуставен, бидејќи на претседателот му е дозволено само со закон да прогласи вонредна состојба за време на војна или други слични национални вонредни состојби, а Јужна Кореја не беше во таква ситуација.с