Распишан оглас за продажба на 13 парцели во Штип

Општина Штип распиша оглас за продажба на 13 градежни парцели. Лазар Хаџи Николов од Одделението за урбанизам во Општина Штип рече дека во дневните весници „Вечер“ и „Нова Македонија“ денеска е објавен оглас за отуѓување на градежно земјиште сопственост на Република Македонија, а ќе се врши по пат на електронско јавно наддавање.

– Осум парцели се наменети за изградба на згради, две за деловни објекти, една за бензинска пумпа и две за лесна и незагадувачка индустрија. Парцелите за седум згради се во населба Сењак 4 и една во Пребег, деловните објекти се на локација Стари-бунари, локацијата за бензинската пумпа е на магистрален пат М6 близу село Драгоево, додека парцелите за лесна и незагадувачка индустрија се на локација во Пребег и место викано Дузмеш, кај село Суво Грло, рече Хаџи Николов.

Тој истакна дека почетната цена на наддавањето се движи од 61 до 2.300 денари. Пријавите за учество на јавното наддавање можат да се достават до 8 август 2017 година на интернет адресата: www.gradezno-zemjiste.mk , а наддавањето ќе се одржи на 10.08.2017 година од 8 до 11 часот во 15-минутни интервали. Ова е прва продажба на градежно земјиште во 2017 година, заради изборната постапка и проблемот со овластувањата на градоначалниците по крајот на мандатот.