Харадинај го одликува американскиот амбасадор Делави за придонесот за Косово

Косовскиот премиер Рамуш Харадинај го одликува денеска амбасадорот на САД, Грег Делави со орденот „Златна карта на Косово“, за неговиот досегашен придонес за Косово, јави дописникот на МИА од Приштина.

- На денешната редовна средба со амбасадорот на САД Грег Делави, од името на Владата и на народот на Косово имав чест да му ја предадам Златната карта на Косово, како симбол на нашето високо вреднување за неговиот голем придонес во поддршка на нашата државна агенда и охрабрувањата за да го сториме најдоброто за сите наши граѓани. Косово поминува низ значајни политички процеси и помошта на нашите американски пријатели беше и ќе остане од витално значење за нашата земја. Господ да ја благослови Америка и нејзиниот народ, напиша Харадинај на Фејсбук.

На Делави наскоро му завршува мандатот во Косово, а американскиот претседател веќе го номинира Филип Коснет за негов наследник. Делави беше амбасадор на САД во Приштина во изминатите три години.