Во меѓународната полициска акција во БиХ приведени полициски функционери во ФБиХ, следува Република Српска

Во денешната меѓународна полициската акција уапсени се повеќе лица во Федерацијата Босна и Херцеговина поради врски со нарко картелот „Тито и Дино“, јави сараевскиот портал Кликс , дополнувајќи дека операцијата се проширува и на Република Српска.

Обвинителството на Босна и Херцеговина претходно соопшти дека акцијата е со цел гонење лица осомничени за организиран криминал, неовластена трговија со големи количества наркотични дроги, перење пари и други поврзани кривични дела. Тие додаваат дека операцијата била поддржана од ФБИ, ДЕА и Европол.

Во акцијата ќе се вклучи и Министерството за внатрешни работи на РС бидејќи, според Кликс, истрагата се проширува и на лица од тој ентитет во Босна и Херцеговина.

Досега повеќе од десет лица се уапсени во акцијата спроведена од припадници на МВР на кантонот Сараево, Зеничко-добојскиот кантон и Агенцијата за истрага и заштита на БиХ (СИПА).

Сараевски Аваз објави дека по наредба на Обвинителството на БиХ досега се уапсени шефот на Специјалната полиција на МВР на Федерацијата БиХ (ФУП) Мустафа Селмановиќ и сараевскиот бизнисмен Гордан Мемија. Приведен е и Вахидин Муњиќ, в.д. директор на ФУП.

Меѓу уапсените се Емир Друшиќ, Адин Ќатиќ и Сенад Кадиќ, специјалци на ФУП, кои пред осум години го чуваа наркобосот Един Гачанин Тито во Сараево. Уапсени се и Миладин и Дражен Чобовиќ, поранешни членови на ФУП, кои го чуваа и Гачанин во Сараево. Неколку лица се уапсени во Мостар и Зеница, каде се уште траат претресите. Порталот Аваз наведе дека во Сараево е уапсен и директор на приватна компанија. Наркобосот Един Гачанин, познат како Тито, во ноември минатата година склучи договор со Обвинителството во Холандија и беше осуден на седум години затвор и парична казна од еден милион евра за шверц на дрога. Един Гачанин е најголемиот балкански наркобос, кој има холандско државјанство, а на американската „црна листа“ е од март минатата година. Роден во Сараево, Гачанин во својот картел вклучил членови на неговото семејство и пријатели од Босна и Херцеговина.