Портпаролот на грчката Влада демантира дека Грција ќе испрати за Украина С-300

Грција нема да направи никаков потег што би ја загрозил воздушната одбрана на земјата, истакна портпаролот на грчката Влада Павлос Маринакис на денешниот редовен брифинг со новинарите, демантирајќи го натписот во „Фајненшл тајмс“ за испраќање противвоздушни ракетни системи С-300 во Украина. јави дописничката на МИА од Атина.

- Досега, во пракса ја покажавме нашата помош за Украина и украинскиот народ. И премиерот реализираше соодветна посета. Сепак, нема да се направи никаков потег, ова го појаснувам за да нема недоразбирање, што ќе ја загрози, па дури и најмалку, способноста за одвраќање или воздушната одбрана на нашата земја. Многупати демантиравме. И денеска одговарам категорично, рече Маринакис.

„Фајненшл тајмс“ објави дека Грција и Шпанија се под притисок од сојузници во ЕУ и НАТО да обезбедат системи за противвоздушна одбрана на Украина, а европските лидери лично ги повикале грчкиот и шпанскиот премиер Киријакос Мицотакис и Педро Санчез за време на Самитот во Брисел минатата недела да достават С-300 во Украина.

Ова е втор пат во период од два месеци медиумите да пишуваат за сценариото Грција да испрати противвоздушни ракетни системи С-300 за Украина.

И на почетокот на февруари, исто како и сега, Маринакис категорично демантираше.