Порака од Форумот во Цетиње: Црна Гора да ја поддржи резолуцијата за геноцидот во Сребреница

Владата на Црна Гора треба да ја поддржи резолуцијата на Обединети нации за геноцидот во Сребреница, да биде нејзин коспонзор, како и да даде недвосмислена поддршка за влезот на Косово во Советот на Европа, се наведува во заклучоците на 3. Форум во Цетиње.

Учесниците на тридневната средба, како што беше соопштено, „по сите презентации и анализи на реномирани експерти“ се согласија на ставот дека „Црна Гора и Западен Балкан се цел на руско влијание, што најчесто се реализира преку инструментите на тврда и мека моќ на српскиот државен апарат“.

Исто така, беше оценето дека етничките и културно-верските разлики во тој контекст се користат како причина за подигање на тензии и предизвикување нестабилност, како и за попречување на интеграцијата на регионот во ЕУ и НАТО.

Учесниците се согласија дека во овој контекст е неопходно да се повика Владата на Црна Гора да не ги исклучува од својата работа важните прашања за Западен Балкан.