Трајковски: Наша обврска е да и направиме проблем на Италија

Фудбалската репрезентација на Македонија по доаѓањето во Торино каде во петок го игра претпоследниот дуел од квалификациите за Светското првенство во Русија 2018 одработе тренинг. Избраниците на селекторот Игор Ангеловски тренираа на теренот каде пред нив тренинг имаше женска екипа на Јувентус.

- Имаме квалитет и можеме до позитивен резултат на ова гостување.Убаво е да играм за националната репрезентација во државата каде играм за мојот тим. Италија е голем фаворит, а наша задача е да им направиме проблеми. Сакаме да ги израдуваме нашите навивачи, а голот што го постигнав во Струмица многу ми значеше, изјави Александар Трајковски кој настапува за Палермо и е еден од тројцата македонски репрезентативци кои играат во италијански клуб.

Македонија утре ќе тренира на „Олимпискиот стадион“ каде во петок вечер (почеток 20:45 часот) ќе се игра натпреварот против Италија.