Познати се сите учесници во осминафиналето, ждрепката во понеделник

Заврши групната фаза на Лигата на шампионите бидејќи се одиграа и последните натпревари во оваа рунда на натпреварувањето.

Во последниот ден немаше многу возбудувања околу тоа кои екипи ќе ги гледаме во нокаут-фазата на Лигата на шампионите поради тоа што поголемиот дел од екипите уште во претходните натпреварија ја завршија работата.

Драма можеше да има во групата Г, во која Лајпциг и Порто имаа еднаков број бодови пред последното коло. Но, Лајпциг беше поразен од Бешикташ, додека Порто го совлада Монако.

Ниту екипата на Ливерпул не беше сто отсто сигурна, но избраниците на Јирген Клоп пред домашната публика го срамнија со земја Спартак од Москва (7-0).

Шахтјор го победи Манчестер сити и со тоа обезбеди пласман во плејофот, додека испадна Наполи, кој беше поразен од Феенорд во Ротердам.

Во останатите натпревари не беше драматично, а ова се 16-те екипи кои ќе играат во осминафиналето на Лигата на шампионите - победници во групите: Манчестер јунајтед, ПСЖ, Рома, Барселона, Ливерпул, Манчестер сити, Бешикташ и Тотенхем.

Второпласирани екипи: Базел, Баерн Минхен, Челзи, Јувентус, Севилја, Шахтар, Порто и Реал Мадрид.

Ждрепката за осминафиналето ќе се одржи на 11-ти декември, додека натпреварите на програмата се на 13-ти и 14-ти февруари, како и на 20-ти и 21-ви. Реваншите ќе се играат на шести и седми, како и на 13-ти и 14-ти март.

Финалето на Лигата на шампионите на програмата е на 26-ти мај, на „Олимпискиот стадион“ во Киев.