Турција поднесе кандидатура за организација на ЕУРО 2024
Турската фудбалска федерација денеска и официјално ја поднесе до УЕФА својата апликација за добивање на организацијата на Европското првенство во 2024 година.
- Нашата федерација, која аплицира четврти пат по ред, го подготви своето најдобро досие во историјата и обезбеди невидена државна поддршка. Ние ги имаме сите гаранции без никакви ограничувања. Вклучувајќи и голем број дополнителни и иновативни гаранции кои ќе обезбедат финансиски успех на турнирот и на тој начин ќе имаат корист сите национални асоцијации на УЕФА. Дојде нашето време, изјави претседателот на турската федерација Јилдирим Демиререн.
Претходно, апликација до УЕФА за домаќин на ЕУРО 2024 поднесе и Германската фудбалска федерација.
УЕФА во наредните недели ќе почне да ги оценува апликациите, а до септември 2018 ќе подготви и објави извештај за евалуација за секој кандидат.
Земјата домаќин ЕП 2024 ќе биде избрана на 27 септември со гласање на состанокот на Извршниот комитет на УЕФА во Нион.
