Почина косовската фудбалска легенда Фадиљ Вокри

Косовскта фудбалска легенда, ѕвездата на косовскиот и југословенскиот фудбал, Фадиљ Вокри, почина утрово од срцев удар на 57-годишна возраст, јави дописникот на МИА од Приштина.

Веста за смртта на Вокри, кој долги години откако престана активно да игра фубал и беше претседател на Фудбалската федерација на Косово, за „Газета Експрес“ ја потврдил негов близок пријател.

- Се верува дека е срцев удар, но го чекаме лекарскиот извештај, изјавил изворот на приштинскиот портал.

Фадиљ Вокри беше славен како еден од најдобрите центарфори во осумдесетите години во југословенскиот фудбал. Играше за фудбалските клубови Приштина и Партизан од Белград, а беше член и на репрезентацијата на тогашната заедничка држава.

Тој го внесе Косово во УЕФА и ФИФА. Во 1986. беше прогласен за фудбалер на годината во Југославија. За репрезентацијата на Југославија одигра 12 натпревари и постигна 6 гола.

Во периодот 1990-92 играше за Фенербахче. Кариерата како фудбалер ја заврши во 1995 година како член на францускиот второлигаш Монтлукон.

Роден е на 23 јуни 1960 година.