„Иранскиот Меси“ ја напушти репрезентацијата на 23 години поради неговата мајка

Напаѓачот на Иран, Сардар Азмун се откажа од репрезентацијата на само 23 години. Причина за одлуката на Азмун е неговата мајка, која неодамна се опоравила од тешка болест, а сега здравјето и се влошило по навредите што ги добил нејзиниот син.

Азмун, чиј прекар е „иранскиот Меси“, постигна 23 гола во 33 натпревари за својата земја пред турнирот.

Во Русија, сепак тој не успеа да реализира гол, а тимот на Карлос Кеирош заврши трет во групата со Шпанија и Португалија.

Тој ја утврди својата одлука да се откаже да настапува за Иран како „болна“.

Во квалификациите тој имаше 11 гола во 14 дуели и одигра 90 минути во секој од трите меча на Мундијалот 2018. Меѓутоа, критиките за неговата игра довеле до разболување на неговата мајка.

- Мајка ми надмина сериозна болест и јас бев среќен. За жал, поради навредите што јас и колегите ги добивме, а воопшто не ги заслужуваме, болеста нејзина стана потешка. Тоа ме става во тешка позиција, во која треба да го изберам едното пред другото и јас ја избирам мајка ми, изјави Азмун, кој игра за Рубин Казан на клупско ниво.

Азмун направи деби за Иран на 19 години и веќе е петти на вечната листа на голгетерите откако е споредуван со фудбалската легенда Али Даи, кој има 109 гола во 149 натпревари.