Мурињо за Сари: Ги има сите услови да заврши добра работа

Новиот менаџер на Челзи, Маурицио Сари ги има сите услови да заврши добра работа на „Стемфорд Бриџ“. Ова е оценката на поранешниот менаџер на тимот од Лондон и актуелниот менаџер на Манчестер Јунајтед, Жозе Мурињо. Медиумите на Островот очекуваат со интерес какви ќе бидат односите меѓу двајцата, мислејќи на тензиите меѓу Специјалниот и претходникот на Сари - Антонио Конте. - Не го познавам. Кога бев во Италија во периодот 2008-2010 година, тој не беше во Серија „А“. Никогаш не сум го сретнал или играл против неговиот тим. Јас само го следам фудбалот и знам за добрата работа која тој ја има направено во последно време во Наполи. Сите добри тренери имаат желба да дојдат во Англија. Ова е луда трка на највисоко ниво, така што секој сонува да има шанса да дојде тука. Тој има фантастичен тим од фантастични играчи. Мислам дека ги има сите услови да заврши добра работа, рече Мурињо.