Османи: Знаеме што не очекува, но ќе го прикажеме најдоброто

Македонскиот шампион Шкендија утре со Ред бул Салцбург го игра првиот натпревар од третото квалификациско коло на Лигата на шампионите.

Тренерот Ќатип Османи и капитенот Арменд Алими пред натпреварот во Австрија истакнаа дека домаќинот е фаворит во пресрет на двомечот, но и дека ќе дадат се од себе да постигнат успех.

- Среќни сме што сме тука и ќе се соочиме со голем клуб како Салцбург. Станува збор за силен противник и мошне квалитетен тим, а тоа за нас ќе претставува тешка задача. Добро анализиравме и знаеме што не очекува. Тука сме да го прикажеме најдоброто од нас, истакна Османи.

Капитенот Арменд Алими смета дека Шкендија нема што да загуби на овој натпревар.

- Салцбург е фаворит, има поголем буџет и поголемо искуство, но кога натпреварот ќе започне на терен остануваат 11 против 11, а тогаш ќе ја покажеме нашата мотивација. Немаме што да загубиме во овој натпревар, туку само можеме да добиеме. Ќе дадеме максимум, а по натпреварот ќе видиме дали тоа ќе биде доволно за позитивен резултат, наведе Алими.

Натпреварот се игра утре со почеток во 19 часот на арената „Ред бул“ во Салцбург.