Ковачиќ замина за Лондон на финализирање на трансферот во Челзи

Халфот на Реал Мадрид, Матео Ковачиќ замина за Лондон за да го финализира трансферот во Челзи.

До крајот на денот, 24-годишниот фудбалер треба да ги помине медицинските прегледи и да се финализира преминувањето во Челзи.

Се уште нема детали околу зделката меѓу Реал Мадрид и Челзи за трансферот, но се очекува хрватскиот репрезентативец да игра како позајмен играч до крајот на сезоната на „Стемфорд Бриџ“, а англискиот клуб да има право да ги откупи целосно неговите права следното лето. Не е исклучена и варијантата 24-годишниот играч од средниот ред да влезе како дел од договорот меѓу Челзи и Реал Мадрид за Тибо Куртоа.

Самиот Ковачиќ одамна изрази желба да си замине од „Бернабеу“, бидејќи не игра доволно. Во последната година тој одигра десет натпревари за Реал Мадрид, а во финалето на Светското првенство во фудбал во Русија се појави како резерва.

„Сините“, најверојатно, ќе го „испратат под наем“ Дени Дринквотер, кој не влегува во сметките на Сари. Евертон и Вест Хем се можните дестинации за 28-годишниот фудбалер, за кого беа платени 35 милиони евра на Лестер пред една година. Дринквотер придонесе за титулата на „лисиците“ освоена во 2016 година.