Виничиус загрижен за своето место во Реал по доаѓањето на Азар

Младата ѕвезда на Реал Мадрид, Виничиус Жуниор, призна дека доаѓањето во „кралскиот клуб“ на еден од најдобрите играчи во моментот – Еден Азар, ќе го намали неговото време на теренот.

Белгиецот долго време се обидуваше да пристигне во мадридскиот клуб, а сега тренерот Зинедин Зидан треба да го изгради тимот околу поранешниот играч на Челзи.

– Доаѓањето на Еден Азар создава ситуација во која би било потешко да играм, но тоа не е проблем за мене, се зависи од Зидан. Кога пристигнав во Реал, бев сосема поинаков играч. Научив многу од секој тренер, кој беше тука. Се развив тактички и ја губам топката поретко. Никој не сака да губи на тренинзите. Дури и Серхио Рамос и Карим Бензема, кои имаат над 30 години, тренираат повеќе од било кој друг и си поставуваат цели, рече 18-годишниот Бразилец.

Зинедин Зидан веќе покажа дека ќе се потпира на Виничиус и дека ќе биде дел од неговата постава, иако времето за играње ќе му биде поограничено од периодот кога на чело на тимот беше Сантијаго Солари.