Бернард Тапи ослободен од кривично гонење во случајот со арбитражата за купопродажбата на „Адидас“

Поранешниот француски министер и претприемач Бернард Тапи беше ослободен од обвинувањата за „измама“ за фамозната арбитража од 2008 година во висина од 403 милиони евра за купопродажбата на „Адидас“, јави дописникот на МИА.

Ова е нова победа за Бернар Тапи, можеби последната за поранешниот министер, претприемач и поранешен сопственик на фудбалскиот клуб Марсеј, кој од 1980-тите години редовно ги ниша елитите и француската политика, слично како Силвио Берлускони во Италија.

Бернард Тапи, неговиот поранешен адвокат Морис Лантурн и актуелниот шеф на телекомуникацискиот гигант Оранж, Стефан Ришар беа ослободени од Кривичниот суд во Париз, по судењето кое траеше речиси еден месец што се одржа во март и април оваа година. По реакциите на денешниот француски печат, пресудата падна како „гром од ведро небо“, ако се знае дека обвинителот побара 5 години затвор за Тапи, 3 години во затвор со 18 месеци условна за Стефан Ришард, и 3 години условна казна за Морис Лантурн.

Ова општо „перење“ на обвинетите значи дека ниту еден од нив не се обидел со нелегални средства да изнуди 403 милиони евра во јули 2008 година по поволната арбитража во случајот познат како „Адидас-кредит Лионе“. Ова, и покрај тоа што арбитражата беше, дефинитивно беше поништена на 18 мај 2017 година од страна на Касациониот суд (Врховниот суд на Франција), кој наметна враќање на оваа сума од Бернард Тапи.

За Бернар Тапи, кој е на возарст од 76 години и заболен од два видови на рак и не беше присутен на рочиштето за читањето на пресудата, ова претставува победа, еден вид на судски реванш, по децениските спорови со банката „Кредит Лионе“, која ја обвинува дека го турнала во банкрот во 1994 година и дека ја продала компанијата со удобна капитална добивка, со цел да ги исчисти своите сопствени загуби во моментот кога банката беше речиси во банкрот.

Роден лобист со ретка издржливост, Тапи никогаш не негираше дека вршел притисок во ходниците на Елисејската палата и француското Министерство за финансии за финансиски надомест, користејќи ги и предностите на неговите контакти со поранешниот претседател Никола Саркози, на власт во времето на арбитражата.

Оваа пресуда, според француските медиуми „особено го означува поразот на француската држава, заплеткана во нејзините противречности“. Кога јавниот обвинител на Париз подигна обвинување против Бернар Тапи во јуни 2013 година за „организирана измама“, кај претседателот на Република во тоа време, Франсоа Оланд, постои очигледно намерата да се неутрализира пријателот на Никола Саркози. Но недостасуваат докзаи за тоа, според вчерашната пресуда на кривичниот суд.

Со вчерашаната пресдуа може да здивне и една друга политичка личност, поранешната министерка за финансии, Кристин Лагард, назначена за претседател на Европската централна банка. Во декември 2016 година, таа бепе прогласена за виновна за „небрежност“ во арбитражата за Тапи. Отсуството на измама и лажирање, според новата пресуда, на тој начин сериозно ги ублажува сомнежите во врска со нејзиното работење во овој случај.