Клоп објасни зошто не се обидел да го врати Кутињо

Менаџерот на Ливерпул, Јирген Клоп изјави дека не направил никаков обид да го врати Филипе Кутињо, бидејќи клубот веќе ги потрошил парите што ги добил од Барселона и не може да си го дозволи.

Вчера Баерн (Минхен) го претастави Кутињо, кој го изнајми за една година со откупна клаузула од 120 милиони евра.

– Можеби звучи чудно, но не можевме да си го дозволиме. Ние веќе ги потрошивме парите што ги добивме за него. Тој е супер играч и супер момче. Ние тогаш не бевме подготвени да го продадеме, но Барселона нè принуди, така да кажеме, со парите што ги понуди. Тој е фудбалер кој може да промени секој натпревар во позитивна насока. Не е толку добро за Борусија Дортмунд, но неговиот трансфер е одличен за Баерн и Бундеслигата, изјави Клоп.