Гатузо би можел да стане тренер на Џенова

По убедливиот пораз од Лацио, во екипата на Џенова најверојатно ќе дојде до промена на тренерот. На Аурелио Андреацоли часовите му се одбројани, а најсериозен кандидат за преземање на функцијата е Џенаро Гатузо.

Доколку Гатузо го преземе кормилото во тимот за кој игра и македонскиот капитен Горан Пандев, дебито на клупата на Џенова би го имал против неговиот поранешен клуб Милан.

Кандидати за тренерското место во Џенова се и Давиде Никола и Стефано Пиоли, но прва желба на претседателот Енрико Прециози е Гатузо.

Џенова во последните четири кола освои само еден бод, и се наоѓа во зоната на испаѓање. Единствената дилема е дали на Андреацоли да му се даде последна шанса против Милан, или веднаш да биде разрешен.