Османи: По членството во СЕ, семејствата на исчезнатите можат да ја тужат Србија пред Судот за човекови права

Косовската претседателка Вјоса Османи денеска изјави дека по приемот на Косово во Советот на Европа семејствата на исчезнатите ќе можат да ја тужат Србија пред Европскиот суд за човекови права.

„По влегувањето во Советот на Европа, сите семејства ќе имаат пристап до Европскиот суд за човекови права, ќе можат да ја тужат Србија за кршење на правото на живот на членовите на семејството, за кршење на правото на човечко достоинство и многу други права. Членството во Советот на Европа ќе биде од корист за сите граѓани, но најмногу за семејствата на кои 25 години им беше ускратена правдата“, рече Османи за време на одбележувањето на Денот на исчезнатите.

Таа рече дека институциите на Косово ќе продолжат да бидат со семејствата и „да ја споделат болката, бидејќи сите 1.600 исчезнати лица се членови на семејствата на цело Косово“.